İstanbul seçkisində nəticələrin müəyyən edilməsində HDP-nin rolu olub. HDP tərəfsiz siyasətini qoruyaraq seçkini bir demokratiya mübarizəsinə çevirməklə, bütün xalqların ümidi olub.

Axar.az xəbər verir ki, bunu Türkiyənin Xalqların Demokratik Partiyasının (HDP) nümayəndəsi Sezai Təməlli bildirib.

Təməlli PKK-nın keçmiş lideri, hazırda İmralı həbsxanasında cəza çəkən terrorçubaşı Abdulla Öcalanın İstanbul bələdiyyə sədrliyinə keçirilən seçkilərlə bağlı HDP-yə bitərəf qalması yönündə çağırışına da münasibət bildirib: "Qütbləşmə siyasətindən yana deyilik, seçki strategiyamız və taktikamız dəyişməzdir".

Qeyd edək ki, Türkiyədə keçirilən bələdiyyə seçkisindən öncə S.Təməlli CHP-nin Ankara və İstanbuldan olan namizədlərinə müraciətində belə bir açıqlama vermişdi: "Mənsur Yavaş və Əkrəm İmamoğlu seçkilərdə qalib gəlsə, bilsinlər ki, 3 milyon kürdün səsi ilə seçiliblər".

Xatırladaq ki, Ankara və İstanbulda bələdiyyə seçkilərində CHP-nin namizədləri qalib gəlib.