Türkiyə ilə Liviya Milli Razılaşma Hökuməti arasında imzalanan Təhlükəsizlik və Hərbi Əməkdaşlığa dair razılaşma memorandumu ilə bağlı qanun layihəsi Türkiyə Böyük Millət Məclisinə təqdim edilib.

Axar.az xəbər verir ki, qanun layihəsində tərəflərin suverenliyi və bərabərliyi, qarşılıqlı hörmət çərçivəsində təhlükəsizlik və hərbi sahələrdə əməkdaşlığın inkişaf etdirilməsi məsələsi öz əksini tapıb:

“Bu məqsədlə razılaşma memorandumu özündə təhlükəsizlik, hərbi təhsil və təlim, müdafiə sənayesi, terrorizm və qeyri-qanuni qüvvə ilə mübarizə, logistika, hərbi planlaşdırma, təcrübə mübadiləsi və tələb olarsa, müdafiə və təhlükəsizlik sahəsində qarşılıqlı əməkdaşlıq ofisinin yaradılması ilə bağlı müddəaları ehtiva edir”.

Qeyd edək ki, 27 noyabrda Türkiyə ilə Liviya Milli Razılıq Hökuməti arasında Təhlükəsizlik və Hərbi Əməkdaşlığa dair razılaşma memorandumu və “Dəniz səlahiyyətlərinin məhdudlaşdırılması” barədə müqavilə imzalanıb.