Kollektiv Təhlükəsizlik Müqaviləsi Təşkilatı və təhlükəsizlik sferasında Ermənistan-Rusiya əməkdaşlığı Ermənistan və Azərbaycan sərhədində stabilliyi təmin edə bilər.

Axar.az xəbər verir ki, bunu Rusiyanın Ermənistandakı səfiri Sergey Kopırkin Ermənistan-Azərbaycan sərhədindəki situasiyanın eskalasiyasını şərh edərkən deyib.

“KTMT Azərbaycan-Ermənistan sərhədindəki situasiyanın neqativ ssenari üzrə inkişaf etməyəcəyi, eskalasiyanın olmayacağına dair faktor və zəmanətçi kimi vacib rol oynayır. Bu vacib və nüfuzlu təhlükəsizlik yastığıdır. KTMT çərçivəsində həmçinin təhlükəsizlik sferasında Rusiya-Ermənistan ikitərəfli qarşılıqlı fəaliyyəti də var. Düşünürəm ki, bu, stabillik və sülhün təmini üçün kifayət qədər nüfuzlu faktorlardır”, – deyə o bildirib.

Qeyd edək ki, 24 fevralda Ermənistan silahlı qüvvələrinin Noyemberyan rayonunun Koti kəndi yaxınlığında yerləşən bölmələrindən Qazax rayonunun Quşçu Ayrım kəndi istiqamətindəki sərhəd döyüş məntəqəsinə diversiya cəhdi baş vermişdi. Cəhdin qarşısı alınmış, ciddi itkilər verməyə məcbur olan düşmənin bir zabiti ağır yaralanmış, digər hərbi qulluqçusu məhv edilmişdi.

Düşmənin diversiya qrupunun qumbaraatan və digər iriçaplı silahların tətbiqi ilə baş verən təxribatının qarşısı alınarkən sərhədçi əsgər Vəliyev İbrahim Ələmşah oğlu qəhrəmancasına şəhid olmuşdu.