Türkiyədə aprelin 11-də gecə 00.00-dan etibarən qüvvəyə minən iki günlük komendant saatını pozduqlarına görə 2 min 756 nəfərə hüquqi və inzibati cəza tətbiq olunub.

Axar.az xəbər verir ki, bu barədə Daxili İşlər Nazirliyindən məlumat yayılıb. Bu qərar bütün dünyanı cənginə alan yeni növ koronavirus (COVİD-19) infeksiyasının ölkədə yayılmasının qarşısını almaq üçün tətbiq olunan qabaqlayıcı tədbirlərə kömək məqsədilə qəbul olunub.

Qeyd edək ki, iki günlük evdən çıxmaq qadağası Ankara, İstanbul, İzmir və digər mərkəzi şəhərlər daxil olmaqla, ölkənin 31 vilayətini əhatə edir. Rəsmi məlumata görə, iki günlük ev şəraitində qalma məhdudiyyəti ölkə əhalisinin 63,64 milyonuna aiddir. Bu qadağa orta hesabla əhalinin 70 faizinə şamil olunur.

Ümumilikdə götürüldükdə, ölkə ictimaiyyətinin əsas hissəsi iki günlük evdən çıxmaq qadağasını anlaşıqla qarşılayıb. Baxmayaraq ki, aprelin 10-da qadağan vaxtına bir neçə saat qalmış bəzi dükan və marketlərə axın olmuşdu. Gün ərzində isə küçə və meydanlar boş olub. Yalnız xüsusi icazəsi olan şəxslərin evdən çıxmasına icazə verilib.

Bu gün bələdiyyələr, eləcə də dövlət qurumları və dərnəklər, xeyriyyə cəmiyyətləri tərəfindən xüsusilə ehtiyacı olan, telefonla müraciət edən ailələrin evlərinə çörək və digər gündəlik tələbat malları çatdırılıb. Türkiyədə dövlətin və əhalinin böhran hallarında qüvvələri birləşdirmək ənənəsi mövcuddur.