Fransada "Şarli Hebdo" kabusu davam edir. Parisdə karikatura jurnalının hazırkı rəhbəri Lorent Suriseanın evinin şəkillərini çəkən iki nəfər şübhəli şəxs qismində saxlanıb.

Axar.az-ın məlumatına görə, fransız polisinin bu gizli əməliyyatını "La Paris" qəzeti xəbərə çevirib. Radikal islamçılardan biri ehtimal edilən şəxs "Riss" ləqəbli indiki baş redaktorun evinin şəkillərini çəkib, motosikletə minərək ərazini tərk edib. Ertəsi gün eyni işi təkrarlayan başqa bir şübhəli şəxs polisin diqqətini çəkib. Bundan sonra polisin araşdırması zamanı ilk gün gələn şübhəlinin dosyesində vaxtilə törətdiyi 20-yə yaxın cinayət işi təsbit edilib. İkinci şəxsin isə dövlətin terrorçular siyahısına saldığı adam olduğu müəyyən edilib. Ancaq polisə çağırılan bu şəxslər bir-birini tanımasını təkzib ediblər. Biri ərazidən keçdiyini, digəri isə dostunu həkimə gətirdiyini ifadəsində qeyd edib. Hər iki şəxs sərbəst buraxılıb.

Qeyd edək ki, islam peyğəmbərinin karikaturasını dərc edən "Şarli Hebdo" satirik jurnalına silahlı basqın olmuş, 12 nəfər öldürülmüşdü.