"Azərbaycanın strateji tərəf kimi önəmi artacaq".

Bu sözləri Axar.az-a açıqlamasında politoloq Qabil Hüseynli söyləyib.

Onun sözlərinə görə, ABŞ Rusiyanın yerini Azərbaycan və Qazaxıstanla dolduracaq:

"Hələ ötən ildən Əfqanıstana daşınan yüklərin həcminin 2-3 dəfə artırılması barədə xüsusi plan hazırlanmışdı. Həmin plana əsasən, əvvəllər Azərbaycandan daşınan yüklər təyyarə ilə aparılırdısa, indi dəniz yolu vasitəsi ilə yüklərin daşınmasına başlanacaq. Tutaq ki, Qara dənizə gələn yük dəmiryolu ilə bizim limanlara gələcək və buradan Xəzər Dəniz Gəmiçiliyi vasitəsilə Aktau şəhərinə daşınacaq. Buradan isə birbaşa Əfqanıstana aparılacaq. Beləliklə, Rusiyadan imtina edilməsinin yerini Azərbaycan və Qazaxıstan dolduracaq. Burada da əsas nöqtə Azərbaycan olacaq. Dividentlərə gəlincə isə Azərbaycan daşınacaq yüklərə görə, yüksək tariflərlə pul alacaq. İndi artıq Xəzər Dəniz Gəmiçiliyi tam gücüylə işləyəcək. Yəni bu qurumun daşıma qabiliyyəti güclüdür, amma tam istifadə olunmurdu. Ola bilər ki, Azərbaycan əlavə gəmilər alsın. Üstəlik Azərbaycana olan etimad artacaq. Yəni bunun həm maddi, həm də mənəvi tərəfi var. Azərbaycanın strateji tərəf kimi önəmi artacaq. Bundan başqa geosiyasi əhəmiyyəti də artmış olacaq".

Qeyd edək ki, bu gün ABŞ Əfqanıstandan daşınan yüklərin Rusiya üzərindən tranzitini dayandırdığını bildirib.