Yozef Blatterin yenidən FİFA prezidenti seçilməsi Almaniyada böyük narazılığa səbəb olub.

Axar.az xəbər verir ki, ölkənin "Bild" qəzeti Blatteri sərt tənqid edərək "Futbol üçün quru bir gün", "Bu seçki üçün utanın" başlıqlı məqalələr dərc edib. Blatterin daha 4 il "bacarıqsızlığı" davam edəcəyi deyilən məqalədə futbolda xaosun da 4 il davam edəcəyi qeyd edilib.

"Spiegel" jurnalı da ilk səhifədə Blatteri tənqid edən məqalə ilə çıxış edib. "Oyunpozan" başlıqlı yazıda dünyanın ən böyük idman birliyi olan FİFA-dan on illərdir ki, sui-istifadə olunduğu iddia olunub.

"Süddeutsche Zeitung" qəzeti də "Əbədi Yozef" başlıqlı xəbərində "FIFA prezidenti yenidən bacardı" ifadələrinə yer verib. Xəbərdə Blatterin başçılıq etdiyi təşkilatda bir çox səlahiyyətlinin həbs olunduğu, lakin prezidentin istefa əvəzinə dünya futbolunu idarə etməkdə olduğu qeyd edilib.

Ölkənin siyasi elitası da məsələyə biganə qalmayıb. Sol Partiyanın həmsədri Bernd Riexinger Blatterə 2006-cı ildə verilən "Almaniya Federativ ləyaqət nişanı"nın geri alınmasını tələb edib.