Baş nazir Nikol Paşinyanın Baş Qərargah rəisi Onik Qasparyanın vəzifəsindən azad olunmasında israr etmək hüququ yoxdur.

Axar.az xəbər verir ki, bu sözləri Ermənistanın müdafiə nazirinin keçmiş müavini, xarici əlaqələr üzrə parlament komissiyasının sabiq başçısı Artak Zakaryan deyib.

“General-polkovnik Onik Qasparyan ilk Qarabağ müharibəsi, Aprel savaşı və son 2020-ci il müharibəsi zamanı düşmənə qarşı döyüşüb.

Qasparyan bütün həyatını silahlı qüvvələrə həsr edib. Sədaqətlə xidmət edib və hörmət qazanıb” , - deyə Zakaryan qeyd edib.

Müdafiə nazirinin keçmiş müavininin sözlərinə görə, Onik Qasparyanın tək səhvi kapitulyasiyadan dərhal sonra Nikol Paşinyanı həbs etməməsi idi:

“Qasparyanın səhvi sizi Müdafiə Nazirliyinin bunkerində xalq qəzəbindən gizlətməsindədir. Onun alicənablığı və vətənpərvərliyi həm də ondan ibarətdir ki, müharibədən sonrakı dövrdə müxalifəti müəyyən müddət hökuməti dəstəkləməyə razı saldı”.

Qeyd edək ki, Nikol Paşinyanın Qasparyanı vəzifədən azad etməklə bağlı təqdimatını Prezident Armen Sərkisyan hələ də təsdiq etməyib.