Bu gün Türkiyənin İzmir şəhərində kənd təsərrüfatı nazirləri müavinlərinin iclası keçirilir.

Kənd Təsərrüfatı Nazirliyindən Axar.az-a verilən məlumata görə, iclas Türkiyənin Böyük İyirmiliyə (G20) sədrliyi çərçivəsində Ərzaq təhlükəsizliyi və dayanıqlı ərzaq sistemləri üzrə Tədbirlər Planının layihəsinin hazırlanması məqsədi daşıyır.

Tədbirdə Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Rüfət Rüstəmzadə və müavini Zaur Əliyevdən ibarət nümayəndə heyəti iştirak edir. İclasda qlobal çağırışlar fonunda ərzaq təhlükəsizliyi və dayanıqlı ərzaq sistemlərə nail olmaq üçün G20 ölkələrinin siyasət istiqamətlərini ehtiva edən Tədbirlər Planı layihəsinin məzmunu ətrafında fikir mübadiləsinin aparılması və sənəd layihəsinin təkmilləşdirilməsi nəzərdə tutulur. Tədbirdə razılaşdırılacaq sənəd 15-16 noyabr 2015-ci il tarixində Antalya şəhərində keçiriləcək G20 dövlət başçılarının iclasında qəbul ediləcək.