Bu gecə Rusiyanın taxıl sazişindən çıxmasından sonra ilk dəfə Odessa limanlarından birinə mülki gəmi daxil olub.

Axar.az xəbər verir ki, bunu Qara Dəniz Strateji Araşdırmalar İnstitutunun tanınmış eksperti və layihə rəhbəri Andrey Klimenko deyib.

“Rusiyasız taxıl dəhlizi mövcuddur. Sentyabrın 16-da saat 17:56-da Türkiyənin “Aroyat” yük daşıyıcısı Qara dəniz limanına daxil olub. Mülki gəminin gəlişi çox böyük əhəmiyyət və nəticələrə malik hadisədir", - o bildirib.

Ukraynanın infrastruktur naziri Aleksandr Kubrakov da bildirib ki, ilk mülki gəmilər Ukrayna limanlarına gedən müvəqqəti dəhlizdən yararlanıb:

“Resilient Africa” və “Aroyat” yükdaşıyıcıları Afrika və Asiya ölkələri üçün təxminən 20 min ton buğda yükləmək üçün Qara dəniz limanının girişinə gedən marşrutdan istifadə etməyə hazır olduqlarını təsdiqləyiblər. Gəmilər Palau bayrağı altındadır və ekipajı Türkiyə, Azərbaycan, Misir və Ukrayna vətəndaşlarından ibarətdir".