Ukrayna Prezidenti Vladimir Zelenski 2023-cü il üçün əmlak, gəlir və xərclər haqqında bəyannamə dərc edib.

Axar.az xəbər verir ki, bu barədə Ukrayna dövlət başçısının saytında məlumat verilib.

Bəyanata əsasən, Zelenski və ailəsinin gəliri 12 milyon 423 min 008 qrivna (təxminən 317 min dollar) təşkil edib. Bu vəsaitin 7 milyon 455 min 972 qrivnası (təxminən 190 min dolları) daxili dövlət borc istiqrazlarının satışından əldə edilib.

Zelenskilər ailəsinin 2023-cü ildəki gəliri əsasən əmək haqqı, bank faizləri və daşınmaz əmlakın kirayə verilməsindən əldə edilən gəlirdən ibarət olub. Ümumilikdə bu məbləğ 4 milyon 967 min 036 qrivna (127 min dollar) təşkil edib.

Prezident Ofisi ötən illə müqayisədə gəlirlərin artmasını kirayə haqqının bərpası ilə izah edib.

Xatırladaq ki, 2021-ci ildə Zelenski ailəsinin ümumi gəliri 10,824 milyon qrivna (276 min dollar), 2022-ci ildə isə Ukrayna liderinin və ailəsinin gəliri təxminən üç dəfə azalaraq 3,692 milyon qrivna (94 min dollar) təşkil etmişdi.