Gürcüstanın Energetika Nazirliyinin hesabına "Kalatoza" ləqəbli David Karseladze tərəfindən pul keçirilməyi barədə məlumatların hamısı yalandır.

Axar.az xəbər verir ki, bunu "Rustavi-2" televiziyasına açıqlamasında Gürcüstanın Energetika naziri Kaxa Kaladze söyləyib. Onun sözlərinə görə, Energetika Nazirliyinin bank hesabı yoxdur:

"Mən Qivi Tarqamadzenin bəyanatını dinlədim. Bu, böyük yalandır. Energetika Nazirliyinin heç bir hesabı yoxdur. Tarqamadzenin söylədiyi "Kala Kapital" bankı Gürcüstanda mövcud deyil. Mənimlə əlaqəli olan yeganə bank isə təsisçisi olduğum "Proqres Bank"dır. O da bir neçə il öncə satılıb. Mən demirəm ki, Vahid Milli Hərəkat Partiyası bunu qəsdən düşünüb. Çox güman ki, onlara da yanlış informasiya verilib".

Qeyd edək ki, bir müddət öncə Vahid Milli Hərəkatın liderlərindən olan sabiq millət vəkili Qivi Tarqamadze David Karseladzenin banklarından birinin Energetika Nazirliyinin hesabına 1,1 milyon dollar köçürdüyünü söyləyib. Tarqamadze bununla bağlı sənədləri də ictimaiyyətə təqdim edib. Pulun köçürülməsinə əsas səbəb kimi tikinti göstərilib. Üstəlik, razılaşmaya zamin olaraq Kaladzenin şəxsi bankı kimi təqdim edilən "Kala Kapital" göstərilib.

Keçmiş güləşçi olan David Karseladze kriminal aləmin məşhur simalarından hesab edilir. "Kalatoza" ləqəbi ilə məşhurlaşan Karseladze 2004-cü ildə Qardabanidə həbs edilib. Sonradan Rusiyaya köçüb.