Rusiya və ABŞ prezidentləri Vladimir Putin və Donald Tramp arasında telefon danışığı siyasi nizamlanmaya yol açır. Bu o deməkdir ki, Rusiya artıq ABŞ üçün bir nömrəli hərbi rəqib deyil.

Axar.az xəbər verir ki, bunu rusiyalı politoloq İqor Korotçenko iki ölkə liderləri arasında ötən gün baş tutan telefon danışığını şərh edərkən deyib.

“Danışıq Rusiya və ABŞ-da cəza çəkən şəxslərin mübadiləsini apardıqdan sonra mümkün oldu. Bu jest telefon danışığının müqəddiməsinə çevrildi. Söhbət bir saat yarım davam etdi. Amma ən əsası, bu söhbət Kremllə Ağ Ev arasında Ukrayna ətrafında vəziyyətin həllinə yanaşmaların axtarışı ilə bağlı birbaşa ünsiyyətə yol açır. Eyni zamanda, Tramp administrasiyasının belə bir sülh planı yoxdur. Əslində, indi müəyyən meyarlar dəsti formalaşacaq ki, biz onlarla danışıqlar masası arxasına əyləşə biləcəyik”, - o bildirib.

O, Rusiyanın hərtərəfli yanaşmada israrlı olacağını vurğulayıb:

“Sadəcə olaraq cəbhə xəttində vəziyyəti dondurmaq və ya Zelenskini Rusiyanın işğal olunmuş ərazilərini, o cümlədən yeni subyektlərin ərazilərini tərk etməyə məcbur etmək Moskvanın mövqeyi deyil, biz daha geniş kontekstdə təhlükəsizlik haqqında düşünməliyik. Rusiyada isə bunu başa düşmək əsaslı şəkildə vacibdir: ən əsası odur ki, ABŞ dostumuz deyil, o, geosiyasi hərbi düşməndir. Sadəcə ABŞ-ın indiki 47-ci prezidentinin dövründə onun bir qədər fərqli prioritetləri var. Rusiya potensial hədəf və ya hərbi rəqib və bir nömrəli siyasi düşmən kimi birinci yerdə deyil. Bu rol indi Çinə keçir”.

Korotçenko qeyd edib ki, fevralın 14-dən 16-a kimi baş tutacaq və ABŞ-ın vitse-prezidenti Vensin qatılacağı Münhen Təhlükəsizlik Konfransında qapalı müzakirələrdə Ukrayna ətrafında baş verəcəklər barədə “beyin fırtınası” aparılacaq:

“Aydındır ki, burada AB və ABŞ-ın konsensus mövqeyi hazırlanacaq və sonra bu, bir növ Zelenski rejimi ilə razılaşdırılacaq. AB ölkələrinin yanaşması Trampı qane etməsə, o, sadəcə onları kobudcasına alçaldacaq”.