Rusiya ilə müharibəyə son qoymaq üçün gələcək danışıqlar zamanı Ukrayna işğal olunmuş torpaqları Rusiya ərazisi kimi tanımayacaq və ordunun ixtisarına razı olmayacaq.

Axar.az xəbər verir ki, bu sözləri Prezident Vladimir Zelenski Çerniqov vilayətində ərazi icmalarının rəhbərləri ilə görüşündə deyib.

“Bizim üçün prioritet güclü ordumuzdur. Ona görə də ordumuzun bir neçə dəfə ixtisar edilməsi “qırmızı xətt”dir. Düzünü desəm, ordunu bugünkü ölçüdə saxlamaq üçün əlimizdən gələni edəcəyik. Müharibənin əvvəlindən üç dəfə böyük olan bir ordu. Bu, bizim təhlükəsizliyimizin təminatıdır - güclü, modernləşdirilmiş ordu, Avropanın ən böyük ordusu", - deyə Zelenski bildirib.

O, həmçinin vurğulayıb ki, digər geosiyasi məsələ Rusiyanın işğal etdiyi heç bir ərazinin Rusiya ərazisi kimi tanınmamasıdır:

“Bu, istənilən halda Ukrayna əraziləridir. Bu, bizim üçün əsas "qırmızı xətlər”dən biridir”.