Feysbukun Vatsapı 19 milyard dollara alması Avropada ciddi narahatlığa səbəb olub.

"Axar.az" türk mətbuatına istinadən xəbər verir ki, Avropa siyasiləri istifadəçiləri Vatsapı boykot edərək Avropa proqramlarından istifadə etməyə çağırıb.

Məlumat təhlükəsizliyi ekspertləri və avropalı siyasətçilər bu satışda istifadəçilərin deyil, Feysbukun qazandığını bildirirlər.

Almaniyanın Şlezviq-Qoldşteyn əyalətinin Məlumat Təhlükəsizliyi Bürosunun rəsmisi Tilo Veyherd istifadəçiləri bu iki xidmətdən istifadə etmək məsələsində xəbərdar edərək, onlara Avropa proqramlarını seçməyi tövsiyə edib.

Vatsapın texniki baxımdan hələ də püxtələşmədiyini deyən Veyherd Feysbuk və Vatsapın məlumatlardan bəlli məqsədlər üçün istifadə etdiyini bildirib.

Avropalı parlamentari Yan Filipp Albrext də bu satışın rəqabət bazarına zərbə vurduğunu deyərək, bu məsələyə Avropa komissiyasının qərar verməsini istəyib.

"Məlumatlarının şübhəli şəkildə yox olmasını istəməyənlər daha təhlükəsiz proqramlardan istifadə etməlidirlər" deyən avropalı parlamentari istifadəçiləri Feysbuk və Vatsapı boykot etməyə çağırıb.