ABŞ gürcü hərbçilərin Əfqanıstan və İraqdakı missiyalarda iştirakı sayəsində 2,5 milyard dollar qənaət edib.

Axar.az xəbər verir ki, bu barədə Gürcüstanın Baş naziri İrakli Kobaxidze Gürcüstanın “İmedi” telekanalına müsahibəsində bildirib.

"Amerika tərəfi bizim Əfqanıstan və İraqdakı missiyalarda iştirakımız sayəsində 2,5 milyard dollar qənaət edib. Eyni zamanda Amerika büdcəsindən ölkəmizə real Amerika yardımı 2,5 milyard dollardan çox azdır", - Kobaxidze deyib.

Gürcüstan hökumətinin başçısı vurğulayıb ki, o, ABŞ Beynəlxalq İnkişaf Agentliyi (USAID) və Demokratiya üçün Milli Fondun (NED) yardım adı altında Gürcüstana ayırdığı pulları nəzərdə tutmur.

Baş nazirin sözlərinə görə, bu təşkilatlar vasitəsilə ayrılan pullar ölkədəki iğtişaşlara xərclənib.

Kobaxidze əlavə edib ki, Gürcüstana yeganə yardım 2008-2011-ci illərdə olub, çünki keçmiş prezident Mixail Saakaşvili rejimini xilas etmək lazım idi.