Ukrayna və Rusiya arasında əsir mübadiləsi ümumilikdə 1000 nəfəri (1000-in 1000-ə) əhatə edəcək və 3 gün davam edəcək. Birinci mərhələdə (ötən gün - red.) 390 nəfər – 390 nəfərə qarşı dəyişdirilib. Onlardan 270-i hərbi qulluqçu, 120-si isə mülki şəxs olub. Bu, mülki şəxslərlə bu miqyasda ilk genişmiqyaslı mübadilədir.

Axar.az xəbər verir ki, bu sözləri rusiyalı politoloq Sergey Markov deyib.

“Ukrayna həbsxanalarından Rusiyaya rəğbət göstərməkdə ittiham olunan şəxslər azad edilib. Rusiya xarici işlər naziri Sergey Lavrov bildirib ki, Rusiya bu prosesi mümkün qədər tez başa çatdırmaq istəyir.

Mülki şəxslərin dəyişdirilməsinə başlanmasının səbəbi isə odur ki, Ukraynadakı rus hərbi əsirlərinin sayı azalır və yaxın zamanda tamamilə tükənə bilər”, - o bildirib.

Qeyd edək ki, bu gün əsirlərin mübadiləsi davam edib və tərəflər bir-birinə 307 əsir qaytarıblar.