Rusiya Federasiya Şurasının Beynəlxalq Əlaqələr Komitəsi sədrinin birinci müavini Vladimir Cabarov Avropa Birliyinin siyasətini sərt şəkildə tənqid edib. O, AB-nin Rusiyaya qarşı sərgilədiyi mövqeyi “dəli olmaq” kimi qiymətləndirib.

Axar.az xəbər verir ki, bu barədə RT məlumat yayıb.

Cabarovun açıqlaması Brüsselin yeni antirusiya sanksiyalar paketi hazırlaması fonunda verilib. Məlumata görə, Avropa Birliyi 20 Rusiya bankının SWIFT beynəlxalq ödəniş sistemindən ayrılmasını müzakirə edir.

“Vəziyyət getdikcə dərinləşir və məncə, onlar tezliklə ayılacaqlar. Çünki anlayacaqlar ki, uçuruma yaxınlaşıblar və tək qalıblar. Hətta amerikalılar belə Rusiyanın tam təcridi ideyasını dəstəkləmir”, – deyə o bildirib.

Cabarov həmçinin qeyd edib ki, Avropa ölkələri bir tərəfdən Rusiya banklarını sistemlərdən ayırmaqla hədələyir, digər tərəfdən isə vasitəçilər üzərindən Rusiya qazı və neftinin alqı-satqısını artırır:

“Bu, əsl riyakarlıqdır. Açıq şəkildə Rusiya ilə əlaqələrin kəsilməsini tələb edirlər, amma pərdə arxasında iqtisadi münasibətləri davam etdirirlər”.