ABŞ Prezidenti Donald Tramp üçün “İbrahim sazişləri"nin genişləndirilməsi əsas prioritetlərdən biridir və yaxın vaxtlarda bu sazişə bir neçə ölkənin qoşulması gözlənilir.

Axar.az xəbər verir ki, bu barədə ABŞ Prezidentinin xüsusi nümayəndəsi Stiven Uitkoff CNBC telekanalına müsahibəsində deyib.

Uitkoff əlavə edib ki, ABŞ "gözlənilməz ölkələr"lə də münasibətləri normallaşdırmaq istəyir.

Onun sözlərinə görə, bu addım Yaxın Şərqdə sabitliyə töhfə verəcək.

Qeyd edək ki, Tramp bu sazişi birinci prezidentlik müddətindəki əsas uğurlardan biri hesab edir. “İbrahim sazişləri” 2020–2021-ci illərdə ABŞ-ın vasitəçiliyi ilə İsrail və bir sıra ərəb ölkələri arasında əldə olunub. 2020-ci ildə İsraillə münasibətləri Bəhreyn, BƏƏ və Mərakeş normallaşdırıb. 2021-ci ildə isə Sudan İsraillə diplomatik münasibətlərin qurulduğunu elan edib. Bu sazişlərdən əvvəl İsrailin ərəb ölkələrindən yalnız Misirlə (1979) və İordaniya ilə (1994) diplomatik əlaqələri mövcud idi.

Daha əvvəl Trampın xüsusi nümayəndəsi bildirmişdi ki, yaxın gələcəkdə Səudiyyə Ərəbistanı, həmçinin Livan, Liviya və Suriya da “İbrahim sazişləri"nə qoşularaq, İsraillə münasibətləri normallaşdıra bilər.