Binəqədi rayonu, Azadlıq prospekti 200/36 ünvanda yerləşən çoxmərtəbəli yaşayış binasında baş vermiş yanğın zamanı Yanğından Mühafizə Hissəsinin əməkdaşları sakinləri xilas edilməsi üçün böyük şücaət göstəriblər.

ANS-in məlumatına görə, Nəsimi rayon Yanğından Mühafizə Hissəsinin baş leytenantı Şahverdiyev Xətai Akif oğlu bir neçə nəfəri alovun cəngindən xilas etsə də, nəticədə özü də zəhərlənmiş, yüngül bədən xəsarəti alıb.

Tibbi müdaxilədən sonra Şahverdiyev Xətai evə buraxılıb. Hazırda baş leytenantın səhhəti üçün heç bir təhlükə yoxdur və o özünü yaxşı hiss edir.

"14-cü mərtəbədən Bilal adlı, orta yaşlı bir şəxsi xilas etdim. Əynimdəki döyüş paltarını, əleyhqazı ona verdiyim üçün özüm zəhərləndim, qolum kəsildi. Amma xilas edə bildim. Öz işimlə, peşəmlə fəxr edirəm. Hələ ki, bununla özümə təsəlli verirəm. İndi yaxşıyam, narahat olmayın".

Bu haqda sosial şəbəkədə onun özü xəbər verib. Şahverdiyev Akif oğlunun səhhəti ilə bağlı narahatlıq keçirənlərə təşşəkkürünü bildirməklə yanaşı rəhmətə gedənlərə dərin hüznlə başsağlığı verib.

Qeyd edək ki, məlum hadisə ilə bağlı ANS telekanalında verilən süjetdə qohumları onun da yaralandığını görərək narahatlıq hissi keçiriblər.