İnsanın informasiya ilə yüklənməyi onlarda depressiyanın dərinləşməsinə səbəb olur.

Bu sözləri Axar.az-a Psixologiya və Konsultasiya Mərkəzinin psixoloqu Elnur Rüstəmov ölkədə depressiya halının gəncləşməsindən danışarkən deyib. Onun sözlərinə görə, həddindən artıq informasiya insanın yüklənməsinə gətirib çıxarır:

"Depressiya hallarının çoxalmasına təsir göstərən bir çox faktor var. İlk növbədə buna informasiya faktoru təsir edir. İndiki dövrdə insanlar günlərinə sosial şəbəkələrlə başlayır və onlarla yekunlaşdırır. Bu isə psixoloji problemlərə yol açır. Bu cür vəziyyət özünəqəsdə səbəb və digər psixi problemlərə yol aça bilər. Ona görə də bu situasiyalarda vaxtında tədbirlər görülməlidir. İnsanlar bütün hallarda özlərinin psixi sağlamlıqlarının qeydinə qalmalıdır".

Xatırladaq ki, Psixi Sağlamlıq Mərkəzinin yaydığı məlumata görə, Azərbaycanda əhali arasında depressiya halları gəncləşir.

Mərkəzin məlumatında bildirilir ki, əvvəllər depressiya yaşı 30-dan yuxarı insanlar arasında yaranırdısa, indi belə hallara gənclər arasında daha çox rast gəlinir.