Səhiyyə naziri Oqtay Şirəliyev "Respublikada İmmunlaşdırma həftəsi"nin keçirilməsi barədə" əmr imzalayıb.

Nazirliyin mətbuat xidmətindən Axar.az-a verilən məlumata görə, əmrdə 2016-cı ilin aprelin 25-30 tarixlərində Respublikanın bütün şəhər və rayonlarında "İmmunlaşdırma həftəsi"nin keçirilməsi, tibb idarə və müəssisələrinin rəhbərlərinə hər hansı səbəblərə görə immunlaşdırmadan kənarda qalan uşaqların İmmunlaşdırma həftəsi ərzində peyvəndlərə cəlb olunmasının təminatı tapşırılır. Eyni zamanda, İmmunlaşdırma həftəsinin nəticələri haqqında məlumatların may-ın 20-dək Respublika Gigiyena və Epidemiologiya Mərkəzinə təqdim edilməsi, cari ilin aprelində Ümumdünya Səhiyyə Təşkilatının dəstəyi ilə Azərbaycanda qızılca və məxmərək xəstəliklərinin eliminasiyasına həsr olunmuş konfransın keçirilməsi, İmmunlaşdırma həftəsinin yekun nəticələri haqqında məlumatların mayın 27-sinədək Səhiyyə Nazirliyinə təqdim edilməsi tapşırılır.

Qeyd edək ki, Ümumdünya Səhiyyə Təşkilatının təşəbbüsü ilə 2006-cı ildən başlayaraq Avropada İmmunlaşdırma həftəsi keçirilir. Azərbaycan isə bu tədbirə 2007-ci ildən qoşulur.