ABŞ mütəxəssislərinin oturaq iş ilə sidik sistemi xərçənginin inkişafı arasında əlaqə olduğunu bildiriblər. Onlar bu qənaətə 2000 nəfərin iştirak etdiyi eksperimentdən sonra gəliblər.

Axar.az Medicina.az-a istinadən xəbər verir ki, alimlər iki minə yaxın könüllünün tibbi məlumatlarını təhlil edərək onları həyat tərzinin xüsusiyyətləri ilə müqayisə ediblər.

Onlar arasında böyrək xərçəngi, həmçinin sidik kisəsi xərçəngi diaqnozu qoyulmuş xəstələr olub. Sağlam könüllülər ayrı bir qrupa seçilib. Bütün iştirakçılar yenidən tibbi müayinələrdən və anketlərdən keçiblər.

Əldə edilən məlumatları tədqiq edən həkimlər böyrək və sidik kisəsində bədxassəli şişləri olan könüllülərin 70%-dən çoxunun oturaq işlə məşğul olduğunu və ümumiyyətlə gün ərzində az hərəkət etdiyini müəyyən ediblər.

Sağlam könüllülər qrupu gündəlik həyatlarında daha yüksək fiziki aktivliyə malik idi.

Alimlər qeyd ediblər ki, böyrək və sidik kisəsi xərçənginin inkişafında əsas təhrikedici faktorun insanın kifayət qədər fiziki fəaliyyət göstərməməsi olduğunu tam əminliklə söyləmək hələ mümkün deyil.

Bu korrelyasiya (əgər varsa) digər tədqiqatlarla təsdiqlənməlidir. Buna baxmayaraq, mütəxəssislər insanlara mümkün təhlükəyə məruz qalmamağı və daha çox hərəkət etməyi tövsiyə edir.