Kingston Universitetinin professoru Dipa Kamdar qaraciyərə zərər verən beş gündəlik vərdişi açıqlayıb.

Axar.az Teleqraf-a istinadən xəbər verir ki, o, "Infobae"yə verdiyi müsahibəsində sağlam həyat tərzinin əhəmiyyətinə diqqət çəkib.

Professor Kamdara görə, spirt qaraciyərin ən böyük düşmənlərindən biridir və bir sıra ciddi xəstəliklərə, o cümlədən sirroza səbəb ola bilər. Bundan əlavə, ultra işlənmiş qidalar və şəkər də qaraciyəri zədələyərək orqanı yağla böyüdür. Kamdar bu vəziyyətin oturaq həyat tərzi ilə daha da pisləşdiyini vurğulayıb və hətta arıq insanların da bu problemlə qarşılaşa biləcəyini qeyd edib.

Siqaretin qaraciyərə mənfi təsirini izah edən professor bu vərdişin orqanda qan axınının pozulmasına səbəb olduğunu və bunun nəticəsində qaraciyərin sağalma qabiliyyətinin əhəmiyyətli dərəcədə azaldığını bildirib. Kamdar həmçinin bir çox dərmanın qaraciyərdən keçdiyini, lakin düzgün istifadə edilmədikdə orqanın hüceyrələrinə ciddi zərər verə biləcəyini xatırladıb. O, buna görə də heç bir xəstəliyi öz-özünə müalicə etməməyi tövsiyə edib.

Qeyd edək ki, əvvəllər qastroenteroloq Elena Butenko qaraciyər sağlamlığını qorumaq üçün diyetə bir neçə məhsul daxil etməyi tövsiyə edib. Butenkonun fikrincə, yulaf əzməsi və avokado qaraciyər üçün faydalı olan əsas məhsullardandır.