İrəvan Kobidəki terminalda (TIR parkı) Ermənistan yük maşınlarının saxlanılması ilə bağlı Gürcüstan tərəfindən izahat gözləyir.

Axar.az xəbər verir ki, bunu Ermənistanın iqtisadiyyat naziri Gevorq Papoyan deyib.

Papoyanın sözlərinə görə, o, bu məsələni İrəvanda gürcü həmkarı Mariam Kvrivişvili ilə görüşdə qaldırıb:

“Kvrivişvili qeyd etdi ki, bu, onun idarəsinin səlahiyyətlərinə aid deyil. Bununla Gürcüstan Maliyyə Nazirliyinə tabe olan maliyyə polisi məşğul olur”.

O vurğulayıb ki, Gürcüstan tərəfinin məlumatına görə, maliyyə polisi müəyyən risklər müəyyən edib:

“Hansı konkret risklərin müzakirə olunduğuna dair aydınlıq gətirilməsini istədim ki, həm biz, həm də biznes qurumlarımız nəyin idxal edilə biləcəyini və nəyin idxal edilə bilməyəcəyini başa düşək. İrəvan hələlik qanun pozuntuları ilə bağlı açıqlama almayıb”.

Erməni nazir bu hadisənin hər hansı siyasi məna daşıyıb-daşımadığı sualına cavab verməyib.

Qeyd edək ki, əsasən tikinti materialları ilə yüklənmiş Ermənistan ixracatçılarının 100-dən çox yük maşını Gürcüstanda ilişib qalıb.