Azərbaycan Slovakiya ilə tərəfdaşlığı yüksək qiymətləndirir.

Axar.az xəbər verir ki, bunu Azərbaycan Prezidenti İlham Əliyev Slovakiyanın Baş naziri Robert Fitsonun X sosial media hesabında etdiyi paylaşıma eyni platformada verdiyi cavabda qeyd edib.

"Əziz Robert, Azərbaycan haqqında doğru və dəyərli sözlərinizə görə təşəkkür edirəm. Tərəfdaşlığımızı yüksək qiymətləndirirəm, Slovakiyaya səfərim zamanı qonaqpərvərliyə görə bir daha təşəkkür edirəm və tezliklə sizi Bakıda görməyi səbirsizliklə gözləyirəm", - İlham Əliyev bildirib.

Qeyd edək ki, Robert Fitso Rusiyaya səfərdən dönərkən Prezident İlham Əliyevdən bəhs edib və Azərbaycan əleyhinə AP-nin qəbul etdiyi qətnamələrə görə Azərbaycan liderinin kəskin tənqidini xatırladıb. O bildirib ki, İlham Əliyev Avropa Parlamentinin yalan yaymaqdan, başqalarının işinə qarışmaqdansa, ilk növbədə Avropanın problemləri ilə məşğul olmalı olduğunu bildirərkən çox haqlıdır.

"Mən də Slovakiyadan Avropa Parlamentinə eyni mesajı göndərirəm, xüsusilə onların son “şedevr” qərarı ilə bağlı", - deyə Fitso Avropa Komissiyasının Slovakiya üçün Avropa fondlardan ayırmaların dayandırılması haqda tövsiyəsini nəzərdə tutaraq vurğulayıb.