2020-ci ildə 44 günlük müharibədə Azərbaycan xalqı məhz şəhadəti şərəf sayanların, şərəfli Azərbaycan Ordusunun və qətiyyətli Ali Baş Komandanın hesabına qalib gəldi və torpaqlarımızı işğaldan azad etdi. Bu gün də ermənilər və onların havadarları bununla barışa bilmir. Bəzi siyasətçilər ənənəvi olaraq kilsə, qondarma “soyqırım” və Qarabağdan istifadəyə çalışır.

Bu sözləri Axar.az-a açıqlamasında deputat Arzu Nağıyev Ermənistanda revanşist qüvvələrin hakimiyyətə gəlməsi ehtimalı haqda danışarkən deyib.

“Ermənistanda revanşist qüvvələr baş qaldırmaqdadır. Məlum məsələdir ki, onlara Rusiya havadarlıq edir. İstər Robert Köçəryan, istər Qagik Çarukyan, Vardanyan, Karapetyan – bunların hamısı məxsusi olaraq hazırlanmış şəxslərdir. İndi də Karapetyan, eyni zamanda Çarukyan və Köçəryana dəstək verirlər, onları hakimiyyətə daşımaq istəyirlər ki, öz ideyalarını həyata keçirsinlər.

Onlar başa düşməlidirlər ki, 7 iyun 2026-cı il seçkilərində qalib gəlsələr belə, qarşılarında güclü Azərbaycan dayanıb”, - ekspert bildirib.

A.Nağıyev vurğulayıb ki, Azərbaycan hazırda müasir silahlarla silahlanmış orduya, çevik xüsusi xidmət orqanlarına, hibrid müharibələr aparmaq qabiliyyətinə malik dövlətdir:

“Köçəryanlar, Sərkisyanlar başa düşməlidir ki, öz xalqını uçuruma aparırlar”.