Konvensiyanın imzalanması bütün Xəzəryanı ölkələr arasında əlaqələrin inkişafına təkan verəcək.

Bu sözləri Axar.az-a açıqlamasında politoloq İlqar Vəlizadə deyib. Ekspert Xəzəryanı dövlətlər arasında münasibətlərin inkişafı üçün münbit şəraitin yarandığını vurğulayıb:

“Xəzər beşliyi” bütün prinsipial məsələlərdə həmrəylik nümayiş etdirdi. Söhbət təhlükəsizlik, sərvətlərin istismar olunması, ekoloji və digər bir sıra mühüm məsələlərdən gedir. Xəzərin hüquqi statusunu müəyyən edən Konvensiya çərçivə sənədidir. Çərçivə Konvensiyasında mübahisəli məsələlərə yanaşmalar öz əksini tapır. Bildiyiniz kimi, Xəzər dənizində əsas mübahisəli məsələlərdən biri də Xəzər dənizindəki “Kəpəz” yatağıyla bağlı idi. Bu yatağın istismarı ilə bağlı Azərbaycanla Türkmənistan arasında fikir ayrılıqları qalırdı. Ancaq Konvensiya üzrə nəzərdə tutulmuş əsaslar bu mübahisəli məsələnin həllinə imkan yaradır. Bu əsaslar modifikasiya olunmuş ortaq xətt prinsipindən ibarətdir. Azərbaycan həmişə Türkmənistan tərəfinə təklif edib ki, “Kəpəz” yatağı məhz həmin prinsip əsasında birgə istismar olunsun. Türkmənistan tərəfi isə indiyə qədər konkret cavab verməyib. Ancaq Xəzərin hüquqi statusu ilə bağlı sənəddə mübahisəli yataqların birgə istismarı ilə bağlı qərar nəinki Türkmənistanla, həmçinin İranla olan və buna bənzər digər məsələlərin həllinə imkan verəcək”.