Ötən il müstəqil şəkildə yaranmış, əsas heyəti əlilliyi olan şəxslərdən ibarət ƏSA Teatrı növbəti ilkə imza atacaq.

Kult.az xəbər verir ki, 2 mayda premyerası olacaq U.Şekspirin “Yay gecəsində yuxu” əsəri əsasında hazırlanmış “Yuxum” romantik komediyası səhnədə eşitmə və danışma məhdudiyyətli şəxslər üçün işarət dili ilə tərcümə olacaq.

Tamaşa zamanı işarət dili ilə tərcümə nəinki ölkəmizdə, hətta dünyada ilk sayılır.

ƏSA Teatrının baş meneceri Nicat Qulam bildirib ki, bu təşəbbüsün əsas məqsədi cəmiyyətin bütün üzvlərini teatra cəlb etmək, onların tamaşaçı olmalarının mümkünlüyünü təmin etmək və teatrlarda işarət dili ilə tərcüməni ənənə halına salmaqdır.

Sözügedən tamaşanın nümayişində 10-u fiziki məhdudiyyətli olmaqla, 15 aktyor iştirak edəcək. Tamaşa 2 may saat 19:00-da Azərbaycan Teatr Xadimləri İttifaqının (Aktyorlar Evi) binasında baş tutacaq.

Qeyd edək ki, işarət dili ilə tərcüməni bu sahədə bir çox uğurlu layihələrə imza atmış Nuranə Abıyeva edəcək.