ODA teatrının rəhbəri Elmin Bədəlov daha bir müstəqil teatr təsis edib.

Bu barədə Axar.az-a məlumat verən Bədəlovun sözlərinə görə, yeni teatr ADO adlanır: "Bu teatr üçün artıq yeni stildə bir tamaşa da hazırlamışıq. Teatrın açılışı günü həmin tamaşanın premyerasını da edəcəyik. Premyara 3 gün – 16, 17, 18 oktyabrda baş tutacaq".

E.Bədəlov onu da bildirib ki, Azərbaycanda bu səpkili teatr yoxdur və təzə tamaşa ölkədə böyük diqqətə səbəb olacaq: "ODA teatrı ölkədəki teatrlara alternativ idisə, ADO bütün teatrlara, o cümlədən ODA-ya da alternativ olacaq.

Çünki bu teatrın öz xətti, özünəməxsus tamaşaları olacaq ki, bu da Azərbaycanda bir ilkdir. Bu teatrda artıq tamaşaçı da tamamilə hadisələrin içində olacaq.

Biz qabaqcadan elan edirik ki, ADO-ya gələnlər istənilən hadisə ilə qarşılaşa bilərlər. Bu baxımdan səhifəmizdə teatr haqda yayacağımız elanları diqqətlə izləsinlər".

Qeyd edək ki, ADO teatrının qurulmasına sentyabrın 1-dən start verilib. ADO Teatrının rəsmi Facebook səhifəsi: fb.com/adoteatr.