Akademik Milli Dram Teatrının direktoru, professor İsrafil İsrafilov görkəmli türk dramaturqu Haldun Tanərin anadan olmasının 100 illiyi münasibətilə keçirilən "Beynəlxalq səhnə əsərləri müsabiqəsi"nin qaliblərinin seçilməsi mərasimində iştirak edəcək.

Teatrın mətbuat xidmətindən Axar.az-a verilən məlumata görə, İ. İsrafilov Avrasiya Yazarlar Birliyinin başçısı Yaqub Öməroğlunun dəvəti ilə beynəlxalq müsabiqənin münsiflər heyətinin üzvü kimi yarışmanın qaliblərinin elan olunması tədbirində də iştirak edəcək.

Müsabiqənin nəticəsi dekabrın 8-də Ankarada elan olunacaq.

Müsabiqəyə 18 ölkədən 109 əsər göndərilib. Qalibləri mükafatlandırma mərasimi Türkiyə Mədəniyyət Nazirliyinin "Kiçik teatr" binasında keçiriləcək.

Qeyd edək ki, Beynəlxalq Türk Mədəniyyəti Təşkilatı - TÜRKSOY 2015-ci ili Türkiyənin tanınmış dramaturqu, yazıçı-publisist Haldun Tanərin (1915-1986) anadan olmasının 100 illiyi münasibətilə "Haldun Taner ili" elan edib.