Akademik Milli Dram Teatrında teatr xadimlərinə TÜRKSOY-un "Haldun Tanər" medalı təqdim olunub.

Axar.az xəbər verir ki, teatr sənətinin inkişafına verdiyi töhfələrə görə xalq artisti Azər Paşa Nemət, Akademik Milli Dram Teatrının direktoru, professor İsrafil İsrafilov, professor Məryəm Əlizadə, yazıçı-dramaturq, əməkdar incəsənət xadimi Afaq Məsud və tanınmış aktyor və rejissor, əməkdar incəsənət xadimi, Cahangir Novruzov "Haldun Tanər" medalına layiq görülüb.

Tədbirdə teatrın bədii rəhbəri-baş rejissoru, xalq artisti Azər Paşa Nemət son illər TÜRKSOY-un həyata keçirdiyi layihələrdən söz açıb. Bildirib ki, qurum türkdilli xalqların ortaq mədəniyyətinin daha geniş coğrafiyada tanınması istiqamətində mühüm işlər görür.

TÜRKSOY-un baş katibi Düsen Kaseinov Azərbaycan teatrının son illər ərzində böyük inkişaf yolu keçdiyini söyləyib.

"Teatrı sevməyən insan özünü sevmir. Azərbaycan teatrına çox yaxından bələdəm və bu sahədə çalışan insanların bir çoxu ilə dostam. Azərbaycanın ən kiçik şəhərlərində belə böyük teatrlar fəaliyyət göstərir. Bu, olduqca təqdirəlayiqdir".