12:46

Mədəniyyət və Turizm Nazirliyinin qərarını gözləyirik.

Bu sözləri YUĞ teatrının direktoru Tərlan Rəsulov teatrın sökülməsi haqda Axar.az-a danışarkən deyib. O, məsələnin hələ tam şəkildə təsdiqini tapmadığını bildirib:

"Hələ ki, ortada dəqiq bir şey yoxdur. Bu haqda Mədəniyyət və Turizm Nazirliyinin bizə məlumat verməsini gözləyirik. Amma tamaşaçılara onu deyim ki, YUĞ teatrı fəaliyyətini dayandırmayacaq. Biz daim yaradıcı işimizi davam etdirəcəyik".

Qeyd edək ki, bu gün tanınmış rejissor Cavid Təvəkkül şəxsi Feysbuk səhifəsində YUĞ teatrının sökülməsi ilə bağlı məlumat yayıb.

***

Bakı şəhərinin baş planına uyğun olaraq, Yasamal rayonu ərazisində söküntü, abadlıq işləri həyata keçirilir.

Bu barədə Mədəniyyət və Turizm Nazirliyindən Axar.az-a verilən məlumatda bildirilib.

"Aparılan yenidənqurma işlərinin planına uyğun olaraq, həmin ərazidə yerləşən Azərbaycan Dövlət "Yuğ" teatrının (M.Muxtarov küçəsi, 83) binasının da sökülməsi nəzərdə tutulub. Mədəniyyət və Turizm Nazirliyi tərəfindən teatrın kollektivinin müvəqqəti olaraq yerləşdirilməsi və fəaliyyəti üçün zəruri işlər həyata keçirilir. Teatrın müvəqqəti fəaliyyət göstərməsi üçün ünvan məlum olduqdan sonra teatrsevərlərə bu barədə məlumat veriləcək", - məlumatda qeyd olunub.

Nazirlikdən bildirilib ki, "Yuğ" teatrı üçün yeni binanın tikintisi məsələsi gündəmdədir.