Teatr yeni binada fəaliyyətini tam gücü ilə davam etdirməyə çalışacaq.

Axar.az xəbər verir ki, bu sözlər YUĞ Dövlət Teatrının kollektivi adından teatrın mətbuat xidmətinin yaydığı mətndə yer alıb:

"Şübhəsiz ki, 10 ildən artıq bir müddətdə fəaliyyət göstərdiyimiz binadan ayrılmaq, yeni məkanda, yeni şəraitdə işləmək elə də asan olmayacaq. Amma teatrımızın kollektivi bu çətinliklərin öhdəsindən gəlmək, yeni məkanda – Dövlət Kukla Teatrının binasında öz yaradıcılıq yolunu davam etdirmək əzmindədir. Tezliklə yeni məkanda, yeni yaradıcılıq işləri ilə görüşmək ümidi ilə".

Xatırladaq ki, Bakı şəhərinin baş planına uyğun olaraq, Yasamal rayonu ərazisində söküntü, abadlıq işlərinin planına uyğun olaraq, həmin ərazidə yerləşən Azərbaycan Dövlət YUĞ teatrının (M.Muxtarov küçəsi, 83) binasının da sökülməsi nəzərdə tutulub. Azərbaycan Respublikası Mədəniyyət və Turizm Nazirliyi YUĞ Dövlət Teatrı yaradıcılıq fəaliyyətini 2016-cı ilin fevral ayının 1-dən etibarən Azərbaycan Dövlət Kukla Teatrının binasında davam etdirməsi barədə qərar çıxarıb.

Qeyd edək ki, YUĞ teatrı bu gün saat 19:00-da köhnə binada (M.Muxtarov küçəsi, 83) T.Rəsulovun quruluşunda hazırlanan "Boy" tamaşası ilə sonuncu dəfə tamaşaçıların qarşısına çıxacaq.