YUĞ teatrının kollektivi dünən Murtuza Muxtarov küçəsində yerləşən binasında son tamaşasını nümayiş etdirdi.

Axar.az xəbər verir ki, fevral ayının 1-dən tamaşalarını Kukla Teatrının binasında oynayacaq teatr kollektivi köhnə binaya "Boy" adlı tamaşa ilə vida etdi.

Tamaşadan əvvəl teatrın rəhbərliyi başda olmaqla, kollektivi və tamaşaçılar həmişə olduğu kimi teatrın foyesini yığılmışdı. YUĞ-un direktoru Tərlan Rəsulov və baş rejissoru Gümrah Ömər teatrın foyesində çıxış edərək bu günə qədər YUĞ-a dəstək olan bütün tamaşaçılara, incəsənət adamlarına və media nümayəndələrinə təşəkkürünü bildirdi. Yuğçular üçün binanın o qədər fərqi olmadığını vurğulayan baş rejissor yeni binada da eyni sevgi ilə qarşılanıb, eyni cür dəstəyi görəcəklərinə ümid etdiklərini söylədi.

"Kitabi-Dədə Qorqud" eposu əsasında səhnəyə qoyulan tamaşanın sonuncu nümayişi sürəkli alqışlarla sona çatdı. Dəqiqələrlə davam edən bu alqışlar həm aktyorların, həm də tamaşaçıların YUĞ-un köhnə binası ilə "yuğsayağı" vidası idi.

Xatırladaq ki, Azərbaycan Respublikası Mədəniyyət və Turizm Nazirliyi YUĞ Dövlət Teatrı yaradıcılıq fəaliyyətini 2016-cı ilin fevral ayının 1-dən etibarən Azərbaycan Dövlət Kukla Teatrının binasında davam etdirməsi barədə qərar çıxarıb.