Patrik Züskindin "Kontrabas" əsəri əsasında "Orkestr məni gözləyir" adlı bir hissəli monotamaşanın premyerası olacaq.

Axar.az xəbər verir ki, YARAT Müasir İncəsənət Mərkəzinin səhnəsində göstəriləcək tamaşa Almaniya Federativ Respublikasının Azərbaycandakı səfirliyinin maliyyə dəstəyi ilə 5 ay ərzində hazırlanıb.

Fevralın 11-i saat 19:00-da nümayiş olunacaq tamaşanı gənc rejissor və aktyor Elvin Adıgözəl hazırlayıb. Tamaşaya giriş sərbəstdir.

Tamaşada 35 yaşlı dövlət musiqi orkestrinin kontrabasçısı öz həyatından, uşaqlığından, gizli sevgisindən danışır. O özünü çox tənha və bədbəxt hiss edir. Amma gizlətdiyi nələrsə var... Bəlkə də heç vaxt, heç kimə demədiyi sirlər əslində onun həyat faciəsinin baiskarıdır.

Qeyd edək ki, Elvin Adıgözəlin çəkdiyi "Buqələmun" filmi 2013-cü ildə Azərbaycan kino sənəti tarixində ilk dəfə LOCARNO beynəlxalq film festivalının yarışma siyahısına daxil olub. "Buqələmun" 10-na yaxın nüfuzlu festivalda nümayiş olunub.