Səməd Vurğun adına Dövlət Rus Dram Teatrında çoxdan gözlənilən "Kazanova: Sevgi dərsləri" tamaşasının premyerası baş tutub.

Axar.az xəbər verir ki, tamaşanın rejissoru İlqar Safat, pyesin müəllifləri Viktor Korkiya və Aleksandr Lavrindir. Xalq artisti Fəxrəddin Manafov ilk dəfə Rus Dram Teatrının səhnəsində çıxış edib. Tamaşa ilə bağlı danışan Manafov bunun böyük məsuliyyət olduğunu bildirib:

"Təxminən dörd ildir səhnəyə çıxmırdım. Düşünürəm ki, tamaşaçılar bizim zəhmətimizi layiqincə qiymətləndirəcəklər. Təkcə özümə deyil, bütün aktyorlara uğurlar arzulayıram".

Tamaşanın rejissoru İlqar Safat xalq artisti ilə çalışmaq imkanı yaratdığına görə teatra təşəkkür edib:

"Kazanova məşhur personajdır, bütün dünya mədəniyyətində adı olan əfsanəvi obrazdır. Dəfələrlə kinematoqraflar və dramaturqlar bu obraza müraciət edib. Şadam ki, mənim xalq artisti Fəxrəddin Manafovla işləmək imkanım yaranıb. Mənə bu imkanı yaratdığına görə Rus Dram Teatrının rəhbərliyinə minnətdaram".