Dünya bankının hesabatında Ermənistanın su çatışmazlığı yaşadığı qeyd olunub.

Axar.az Teleqraf-a istinadla xəbər verir ki, bunu "Sudan İstifadə Sahəsində Mütəxəssislər" İctimai Birliyinin sədri Amin Məmmədov "Environmental Protection First" QHT Koalisiyasının “Ermənistan ərazisində həyata keçirilən dağ- mədən sənayesi fəaliyyətlərinin ətraf mühitə təsiri” mövzusunda brifinqində deyib.

O bildirib ki, Ararat vadisində kommersiya balıqçılığı və suvarma üçün yeraltı suların çıxarılması onların illik təbii bərpası həddini aşır:

"Suvarma tələbatını ödəmək üçün Sevan gölündən axıdılmasına icazə verilən suyun həcmi tarixi təbii axın göstəricilərini əhəmiyyətli dərəcədə üstələyir. Nəticədə Göyçə gölünün quruması təhlükəsi artır, orada olan fauna müxtəlifliyinə mənfi təsir edir. Ümumiyyətlə, Azərbaycan Qafqazda aşağı axın ölkəsi olduğu üçün Ermənistanda transsərhəd çaylarının çirkləndirilməsi ən çox Azərbaycana təsir edir. Buna görə də ESPO konvensiyasına uyğun olaraq Ermənistan hökuməti bununla bağlı hesabat verməlidir”.

O qeyd edib ki, Ermənistanın dağ-mədən sənayesinin nəinki özünün eyni zamanda bölgənin ekologiyasına təhdidlər yaradır:

"Bu sənayenin tullantıları qrunt suları vasitəsi ilə trassərhəd çaylarına düşür. Beləliklə, digər ölkələrin ekologiyasına ziyan vurur. Alaverdi və Sünikdə olan karyerlərin xüsusən qrunt sularının çirklənməsinə təsiri qeyd olunur".