Xarici ölkələrin xəbər agentliklərinin rəhbərləri “Pxençan-2018” Qış Olimpiya Oyunları ilə bağlı Koreya Respublikasının Yonhap agentliyinə təbrik məktubları ünvanlayıblar.

Azərtac xəbər verir ki, bu barədə Yonhap agentliyi məlumat yayıb.

Agentlik bildirir ki, “Pxençan-2018” Olimpiadasını işıqlandırmaq üçün təsis edilən və müxtəlif ölkələrdən 54 xəbər agentliyini özündə birləşdirən PNN (Pyeongchang News Servise Network) platformasına qoşulan agentliklərin rəhbərləri Olimpiya Oyunları ilə bağlı səmimi arzularını dilə gətiriblər.

Dünya Xəbər Agentlikləri Konqresinə, habelə Asiya və Sakit Okean Ölkələri Xəbər Agentlikləri Təşkilatına (OANA) sədrlik edən AZƏRTAC-ın baş direktoru Aslan Aslanov təbrik məktubunda Olimpiya Oyunları kimi möhtəşəm idman tədbirinin işıqlandırılmasında koreyalı həmkarlarına uğurlar arzulayıb. Əmin olduğunu bildirib ki, Yonhap-ın peşəkar kollektivi bu işin öhdəsindən yüksək səviyyədə gələcək.

Xəbərdə Qış Olimpiya Oyunları ilə əlaqədar İtaliyanın ANSA agentliyinin baş direktoru Cüzeppe Çerbone, Yaponiyanın Kyodo agentliyinin prezidenti Masaki Fukuyama, Slovakiyanın TASR agentliyinin baş direktoru Vladimir Puçala, İordaniyanın Petra agentliyinin rəhbəri Feysəl əş-Şbul, həmçinin Qətər, Kipr, BelTA, İİNA və Sudan agentlikləri tərəfindən də təbrik məktubları göndərildiyi qeyd olunur.

Təbrik məktubları haqqında Yonhap agentliyinin televiziyasında -“Yonhapnyus TV”də süjet yayımlanıb. Süjetdə AZƏRTAC-ın baş direktorunun videotəbriki də yer alıb.

Qeyd edək ki, AZƏRTAC və Yonhap Dünya Xəbər Agentlikləri Konqresi və OANA çərçivəsində, həmçinin ikitərəfli formatda yüksək səviyyəli əlaqələr qurub. On ildir əməkdaşlıq edən iki agentlik OANA İcraiyyə Komitəsinin 2015-ci ildə Seulda keçirilmiş 39-cu iclası çərçivəsində yeni tərəfdaşlıq Sazişi imzalayıb.