Bir çox danışıqlar kimi, Rusiya-Ukrayna məsələsi ilə bağlı servis diplomatiyası da absurd teatrını – həm məntiqə, həm də sağlam düşüncəyə zidd olan qanlı bir teatrı xatırladır.

Axar.az xəbər verir ki, bunu Azərbaycanın keçmiş xarici işlər naziri Tofiq Zülfüqarov deyib.

Onun sözlərinə görə, Rusiya rəhbərliyinin təcavüzün lap əvvəlində açıq şəkildə ifadə olunmamış məqsədləri bu günə, o cümlədən danışıqların hazırkı mərhələsinə qədər sirr olaraq qalır.

Politoloq qeyd edib ki, işğal olunmuş ərazilər, o cümlədən Krım Ukrayna Konstitusiyasına əsasən, referendum keçirilmədən Rusiyaya verilə bilməz:

“Bu o deməkdir ki, nə Prezident Zelenskinin, nə də başqa hər hansı bir şəxsin Konstitusiyanı pozmadan bu variantı müzakirə etmək və ya hətta onunla bağlı danışıqlar aparmaq hüququ var.

Nəticə etibarilə, bu ərazilərin gələcək, potensial statusu mahiyyət etibarilə hərbi-texniki xarakter daşıyan, hərbi əməliyyatların və qarşılıqlı olaraq kritik infrastrukturun məhv edilməsinin dayandırılmasını hədəfləyən bir sazişin tərkib hissəsi ola bilməz. Bununla da atəşkəs sazişinin bağlandığı anda təmas xəttinin konfiqurasiyası necə olursa-olsun, sözügedən ərazilərin siyasi statusu beynəlxalq hüquqa əsasən dəyişməz qalacaq: onlar işğal olunmuş ərazilər olaraq qalacaqlar.

Buna görə də Rusiya prezidentinin "qələbə" elan etmək məqsədi sadə bir səbəbə görə nə mümkün, nə də əldə edilə biləndir: "Kiyevi üç günə ələ keçirmək" planı iflasa uğradı və cəbhədəki vəziyyətə əsasən, bu, hətta "33 il" ərzində belə baş verməyəcək...

Həmçinin aydındır ki, hətta həqiqətən də mümkün olan hərbi-texniki razılaşmadan sonra belə mövcud Kremlin rəhbərliyinin siyasi gələcəyi, yumşaq desək, qısamüddətli və şöhrətsiz görünür...

Bəs, onda indiki danışıqlar nədən ibarətdir?”, - Zülfüqarov bildirib.