Ərzurumun düşmən işğalından qurtuluşunun və Azərbaycan Xalq Cümhuriyyətinin 100-cü ildönümü münasibətilə bu şəhərdə Azərbaycan bulvarı, Heydər Əliyev parkında “100-cü il Qəhrəmanlar abidəsi”nin açılışı olub.

Axar.az xəbər verir ki, Ərzurum Böyükşəhər Bələdiyyəsi, Azərbaycanın Türkiyədəki səfirliyi, Eko Avrasya Dərnəyi və Türkiyə Dil və Ədəbiyyat Dərnəyi Ərzurum şöbəsinin ortaq həyata keçirdiyi tədbirdə AKP-nin Ərzurumdan olan millət vəkilləri İbrahim Aydəmir və Mustafa İlicalı, Azərbaycanın Qarsdakı Baş Konsulu Nuru Quliyev, millət vəkili Qənirə Paşayeva, Regional Hüquqi və İqtisadi Maarifləndirmə İB-nin sədri Arzu Bağırova və bir sıra rəsmi şəxslər, ziyalılar, QHT-lər iştirak ediblər.

Q.Paşayeva çıxışı zamanı cümhuriyyət qurucuları, onların fədakarlıqlarından, ermənilərin 100 il əvvəl Ərzurum və Azərbaycan torpaqlarında törətdiyi dəhşətli cinayətlərdən danışıb.

O bildirib ki, “Qəhrəmanlar abidəsi” türk millətinin 4 böyük qəhrəmanına - Nuri Paşaya, Mürsəl Paşaya, Kazım Qarabəkir Paşaya və Gəncəli Seyidova qoyulub.

“Birlikdə Azərbaycan və Türkiyəyə qarşı terror hadisələri, cinayətlər, işğallar həyata keçirənlərə qarşı mübarizəmizi gücləndirməliyik”, - millət vəkili qeyd edib.

Q.Paşayeva sonda yerli KİV-in suallarına cavablandırıb, QHT-lər və yerli sakinlərlə görüşlər keçirib.