Tovuzda polis əməkdaşlarının növbəti reydi qalmaqalsız ötüşməyib.

ARB 24 xəbər verir ki, bu dəfə yol polisləri Tovuz rayonunda yük avtomobillərinin təhlükəsiz hərəkətini təmin etmək üçün səfərbər olub. Onlar yük avtomobillərinin arxasına işıq əksetdiricilər yapışdırıb.

Lentlərin üzərinə 50 metr məsafədə işıq düşdükdə artıq arxadan gələn nəqliyyat vasitəsi xəbərdar olur. Bu da sürücünün tam olaraq təhlükəsiz şəkildə hərəkətini təmin edir. Görülən qabaqlayıcı tədbirlər sürücülərin də ürəyincədir.

Sürücü: "Gecələr faydalıdır. Yolun qırağında saxlayanda gələn görür”.

Bu sürücüdən fərqli olaraq kameranın obyektivinə qaydaları kobud şəkildə pozan sükan sahibləri də tuş gəldi. Onlar necə gəldi avtomobil idarə etdikləri üçün cərimələndilər. Təbii ki, bu kimi hallar bir çoxlarının heç də ürəyincə olmadı. Məsələn, bir sürücü avtomobili heç bir hüququ olmadan idarə etdiyi azmış kimi, hələ çəkiliş qrupuna hədə-qorxu da gəldi.

Qaydanı pozan sürücü: "Yeri get işinlə məşğul ol. Sənə kim ixtiyar verib ki, məni çəkəsən? Qayda pozmamışam. Səni tapacam mən! Səninlə söhbət edəcəm! Baxarsan”.

Daha bir sürücü isə qayda pozaraq ərazidən uzaqlaşmağa cəhd göstərib. O, polisin saxla əmrinə tabe olmayıb. Uzun sürən qaçdı-qovdudan sonra avtomobil sahibi saxlanılaraq cərimə edilib. Etdiyi hərəkətin səbəbini soruşanda isə bir kəlmə ilə özünə haqq qazandırmağa çalışıb:

"Yazıb göndərmək olur da ünvana”.

Əgər hər hansısa sürücü məsuliyyətə cəlb edilirsə, deməli, o, qayda pozaraq qəza şəraiti yaradıb. Bu isə heç də xoş hal deyil. Hər bir sükan sahibi insan həyatını düşünərək mühərriki işə salmalıdır.