"Yeni məktəblər inşa olunduqca II növbədə dərs keçən siniflərin sayı ilbəil azalacaq".

Bu sözləri Axar.az-a Təhsil Nazirliyinin mətbuat xidmətinin rəhbəri Cəsarət Valehli bir çox məktəblərin ibtidai siniflərində dərslərin ikinci növbədə keçirilmə səbəbi ilə bağlı danışarkən bildirib. Nazirlik sözçüsü qeyd edib ki, məktəblərdə təhsil prosesinin təşkili üçün əlverişli şərait yarandıqca II növbədə dərs keçən siniflərin sayı da azalacaq:

"Birinci növbəyə keçmək tədricən baş verəcək. Yeni məktəblər inşa olunduqca, təhsil prosesinin təşkili üçün əlverişli şərait yarandıqca ikinci növbə birdəfəlik aradan qalxacaq".

C.Valehli vurğulayıb ki, ikinövbəlilik problemi hələlik tam aradan qaldırılmayıb:

"Bu müvəqqətidir. Ancaq hər hansı bir məktəbin ikinövbəli olmasına baxmayaraq, I siniflər və buraxılış sinifləri I növbədə təhsil alırlar".

Qeyd edək ki, ötən ilin sonlarında Təhsil Nazirliyi 2014-2017-ci illərdə Azərbaycan məktəblərində ikinci növbənin tamamilə ləğv olunacağını bildirdmişdi. İbtidai siniflərin isə ümumiyyətlə ikinci növbədə təhsil almayacağını vurğulamışdı. Lakin artq yeni dərs ili başlamasına baxmayara, bir çox məktəblərdə, xüsusilə də ibtidai sinif şagirdləri məktəbə ikinci növbədə gedir.

Xatırladaq ki, dünya psixoloqlarının qənaətinə görə, orta məktəb şagirdlərinin, xüsusilə ibtidai siniflərin ikinci növbədə təhsil alması onların qavrama qabiliyyətinə mənfi təsir göstərir.