AB-nin Cənubi Qafqaz və Gürcüstandakı böhran üzrə xüsusi nümayəndəsi Maqdalena Qrono Azərbaycana səfərindən yazıb.

Axar.az xəbər verir ki, Qrono bu barədə X səhifəsində paylaşım edib.

“Azərbaycanda növbəti müntəzəm məsləhətləşmələr silsiləsi başa çatdı. Sentyabrın 10-da Bakıda Azərbaycanın xarici işlər naziri Ceyhun Bayramov, həmçinin Azərbaycan Prezidentinin köməkçisi Hikmət Hacıyev və Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyovla görüşdüm.

Biz AB-nin Azərbaycan və Ermənistan arasında ikitərəfli sülh prosesinə dəstəyini, o cümlədən keçmiş münaqişələrin nəticələri ilə bağlı humanitar məsələləri, həmçinin qarşılıqlı bağlantı və regional əməkdaşlıq məsələlərini müzakirə etdik.

Sentyabrın 11–12-də ilk dəfə olaraq Azərbaycan hakimiyyəti tərəfindən diplomatik korpus üçün təşkil edilmiş Qarabağ və Şərqi Zəngəzurun keçmiş münaqişədən zərər çəkmiş ərazilərinə səfərə qoşuldum. Məqsədimiz ərazidəki vəziyyətlə tanış olmaq idi.

Səfər çərçivəsində yerli hakimiyyət orqanlarının nümayəndələri, keçmiş məcburi köçkünlər və media nümayəndələri ilə görüşmək imkanımız oldu. Həmçinin müxtəlif mədəni və dini irs abidələrini, o cümlədən məscid və kilsələri ziyarət etdik.

Azərbaycanlı həmkarlarımla görüşlərdən sonra sabah İrəvanda Ermənistan hakimiyyətinin və vətəndaş cəmiyyətinin nümayəndələri ilə keçirəcəyim görüşləri səbirsizliklə gözləyirəm”, - paylaşımda bildirilib.