Bakının Bayıl ərazisində "Yeni şəhər" yaşayış kompleksinin sakinlərinin başı dərddədir. Binalar məsuliyyətsiz və tikinti normalarına ziddi inşa olunduğu üçün yenidən tikilir.

Axar.az-a verilən məlumata görə, bir müddət əvvəl yaşayış binalarında çatlar əmələ gəlib və bu vəziyyətdən həyəcanlanan sakinlər dərhal Fövqəladə Hallar Nazirliyinə müraciət ediblər.

FHN-nin əməkdaşlarının kompleksə keçirdiyi baxış zamanı tikinti normalarına əməl olunmadığı aşkarlanıb. Nazirlik qəzalı vəziyyətdə olan evlər barəsində akt tərtib edərək Bakı Şəhər İcra Hakimiyyətinə göndərib.
Sakinlərin məlumatına görə, artıq Almaniyadan dəvət olunmuş tikinti mütəxəssisləri binalarda yaranmış çatların müasir texnologiyalar vasitəsilə qarşısını alıblar. Ardınca isə kompleks yarımçıq sökülərək yenidən inşa edilməyə başlayıb. Burada yaşayan insanlar isə müvəqqəti köçürülüblər.

Sakinlər deyirlər ki, vaxtında FHN-ə müraciət olunmasaydı, böyük fəlakət baş verəcəkdi. Onlar tikinti şirkətini ittiham edərək bildirirlər ki, "Yeni şəhər" kompleksinin rəhbərliyi vətəndaşların taleyinə biganə yanaşaraq mənzilləri tələm-tələsik, normativ aktlara cavab verməyən səviyyədə inşa edib. Nəticədə şirkət ikiqat ziyana düşüb.

Qeyd edək ki, bu binalar Səbayel rayonu, "20-ci sahə" adlanan yaşayış massivi ilə Bayıl arasında yol üstündə yerləşir. Hazırda binaların tikintisi davam edir. Yüzlərlə ailə isə başqa ünvana köçürülüb.