Mayın 29-da Bakıda keçiriləcək UEFA Avropa Liqası turnirinin final oyununa gələn turistlər üçün Gürcüstana və rayonlarımıza rahat gediş-gəliş məqsədilə əlavə avtobuslar xəttə buraxılacaq.

Axar.az xəbər verir ki, bu barədə məlumatı Dövlət Avtomobil Nəqliyyatı Xidmətinin (DANX) ictimaiyyətlə əlaqələr sektorunun müdiri Nuridə Allahyarova qeyd edib. O bildirib ki, DANX Tiflisdən Bakıya və əks istiqamətdə hərəkət edən müntəzəm marşrut xətləri üzrə avtobusların artırılmasına dair müvafiq daşıyıcılara tapşırıq verib:

“UEFA Avropa Liqası turnirinin final oyununu izləmək üçün azarkeşlərin bir çoxunun Gürcüstana səfər edərək, oradan Bakıya gəlməsi ehtimalının böyük olduğunu nəzərə alaraq, 27-31 may tarixlərində mövcud “Bakı-Tiflis-Bakı” marşrut xəttinə əlavə avtobuslar buraxılacaq.

Həmçinin regionlarımızdan Bakıya gələcək və ölkənin turistik məkanlarına istirahət üçün üz tutacaq azarkeşlərin Quba, Qusar, Şamaxı, İsmayıllı, Qəbələ, Şəki, Zaqatala, Qax şəhərlərinə rahat gediş-gəlişi üçün həmin tarixlərdə ümumilikdə əlavə olaraq 100 avtobus xəttə buraxılacaq”.