Türkiyənin Azərbaycandakı səfiri Ərkan Özoral bu gün bəzi xəbər saytlarında Türkiyədə qeyri-leqal yaşayan Azərbaycan vətəndaşlarının kütləvi şəkildə deportasiyasına başlanmasına dair yayılan xəbərlərə münasibət bildirib.

Səfir Axar.az-a açıqlamasında deyib ki, həmin xəbərlər həqiqəti əks etdirmir.

Türkiyədə yaşayan azərbaycanlıların problemləri məsələsi Türkiyə Respublikasının vitse-prezidenti Fuat Oqtayın və Azərbaycan Respublikasının Baş naziri Novruz Məmmədovun sədrliyi ilə Bakıda keçirilən Azərbaycan-Türkiyə iqtisadi əməkdaşlıq üzrə Birgə Hökumətlərarası Komissiyanın səkkizinci iclasında da müzakirə olunub və problemlərin həlli üçün lazımi addımların atılması qərara alınıb.