Fasiləsiz yağan qarla əlaqədar Quba-Xınalıq yolunda qar uçqunu baş verib.

Axar.az xəbər verir ki, baş vermiş uçqunla əlaqədar 6 kəndlə nəqliyyat əlaqəsi tamamilə kəsilib. Fevralın 22-si gecə saatlarında baş verən qar uçqunu Quba-Xınalıq yolunun bağlanmasına səbəb olub.

Qubadakı 6 saylı yol istismar idarəsinin rəisi Aydəmir Manafov bununla bağlı Azərtac-a açıqlamasında qar uçqununun Quba-Xınalıq yolunun 35-ci kilometrliyində qeydə alındığını bildirib. Bu ərazidə uçqun nəticəsində yola tökülən qar təbəqəsinin hündürlüyü 28 metrə çatır.

Qeyd edək ki, işçi briqadaları gecə saatlarından yolun qardan təmizlənməsi üçün fəaliyyətə başlayıb. Hazırda yolun rayon mərkəzindən uçqunun qeydə alındığı 35-ci kilometrliyədək hissəsi qardan təmizlənib və avtomobillərin hərəkəti təmin olunub.

Quba-Xınalıq yolunun günün sonuna kimi avtomobillərin hərəkəti üçün açılması nəzərdə tutulub.