Son həftə ərzində pik hədd olaraq 158 nəfərin koronavirusa yoluxması qeydə alınıb.

Axar.az xəbər verir ki, bunu TƏBİB-in İdarə Heyətinin sədri Ramin Bayramlı Operativ Qərargahın brifinqində deyib.

"Test tədqiqatlarımız davam edir. Ötən həftə 755 nəfər koronavirusa yoluxma faktı qeydə alınmışdı, bu həftə ərzində isə 581 nəfərin yoluxması qeydə alınıb.

Bu günə qədər 3855 nəfərdə koronavirusa yoluxma halı qeydə alınıb. Bu göstəricilər sərt karantin qaydaları yumşaldıqdan sonra stabilləşməyə meyili göstərir. Lakin bu, rahatlaşmağa əsas vermir. Buna görə də tədqiqatlar davam edəcək və mütəmadi olaraq məlumatlar veriləcək", - o bildirib.

R.Bayramlı qeyd edib ki, qarşıdakı günlərdə sağalanların sayının daha yüksək olacağı gözlənilir:

"Bu həftə ərzində 581 nəfər yoluxub, 384 nəfər sağalıb. Ötən həftə isə 755 nəfər yoluxmuşdu, 365 nəfər sağalmışdı. Doğrudur, həftə başa çatmasa da, sağalanların sayında artım müşahidə olunur. Ötən həftə və bu həftə ərzində 7 nəfər ölüb".

R.Bayramlı əlavə edib ki, Bakı, Gəncə, Lənkəran, Yevlax, Salyan, Cəlilabad, Göyçay, Abşeronda yoluxma halları üstünlük təşkil edir.