Cərimələrin artırılması təkcə qanunvericilikdə dəyişiklik deyil. Bu, həm də ailələrin, insanların, dövlətin təhlükəsizliyidir. Kiminsə laqeydliyi üzündən insanlar virusa yoluxursa, deməli, cərimələr sərtləşdirilməlidir. Hətta başqa inzibati tədbirlər də görülməlidir.

Axar.az xəbər verir ki, bu sözləri parlamentin iclasında Siyavuş Novruzov karantin qaydalarının pozulmasına görə nəzərdə tutulan cərimələrin artırılmasına münasibət bildirərkən deyib.

Deputat deyib ki, qaydaları daha da sərtləşdirmək lazımdır:

“Biz insanlara deyirik ki, 30 qəpik ver maska al, 100 manat cərimə olunma. Bu, həm də onun ailəsinin, anasının, atasının sağlamlığıdır”.

Komitə sədri sosial şəbəkələrdə “pandemiya yoxdur”, “yalandır” kimi fikirlər yazanların da cəzalandırılmalı olduğunu deyib:

“İctimai yerlərdə - marşrutlarda, metrolarda maska taxmayın, koronavirus yoxdur” deyənlər də cərimələnməlidir. Deyirlər ki, qaydaları pozun, onsuz da Prezident, I vitse-prezident cərimələri ləğv edəcək. Mən başa düşürəm, Prezident şəhid ailələrinə, zəlzələdən zərər çəkənlərə, evi yananlara kömək edir - bunlar doğrudur. Amma binanın üstünə çıxıb kabab çəkən adamın cəriməsini niyə dövlət başçısı verməlidir? Belələrindən cəriməni almaq lazımdır ki, maskanı taxmağın vacib olduğunu anlasın”.